ሰበር ዜና! የመለስ ፋውንዴሽን ተዘጋ! – ነፃነት ዘለቀ

March 25,2016

ይህን የመለስን ፋውንዴሽን መዘጋት በሚመለከት “ዜና ላድርገው ወይንስ መጣጥፍ?” ብዬ ብዙ ተጨነቅሁ፡፡ ዜናም ላድርገው መጣጥፍ መቼም እስካሁን የቀደመኝ እንደማይኖር ተስፋ አለኝ፡፡ ወደሰበር ዜናው ላምራ፡፡

የሕዝብ ዋይታ የፈጠረው ዕንባና ያፈሰሰው የንጹሓን ደም ፈጣሪ ዘንድ ጮኸው ባመጡት የጸሎት መልስ ለገሠ ዜናዊ – በፖለቲካዊ የብዕር ስሙ መለስ ዜናዊ – የሚባለው ሽፍታ  የዛሬ አራት ዓመታት ገደማ ከሥሩ ተግነድሶ አይሞቱ አሟሟት መሞቱ የሚታወስ መሆኑን የገለጸልን ይህን ሰበር ዜና ያደረሰን ግለሰብ በመቀጠልም በዚህ ዱርዬ ሀገር አጥፊ ስም ተቋቁሞ የነበረውና ካዛንቺስ አካባቢ የሚገኘው ፋውንዴሽን ላልተወሰነ ጊዜ መዘጋቱን ጠቁሟል፡፡

አቶ ነፃነት ዘለቀ የሚባሉ – ባጋጣሚ ሆኖ የዜናውም ዘጋቢ እርሳቸው ናቸው – የአዲስ አበባ ኗሪ ዛሬ መጋቢት 16 ቀን 2008 ዓ.ም – በዕለተ ኪዳነ ምሕረት – ከቤታቸው ወደ ሥራቸው ለመሄድ ዝምቡን እንኳን እሺ የሚልለት ሰው ሳይኖር ኦናውን ተገትሮ በሚውለው በዚያ ፋውንዴሽን አጠገብ ሲያልፉ የተመለከቱት ነገር ከባድ ምልኪያዊ ገጽታ እንዳለው የደረሱበት መሆኑንም አልሸሸጉም፡፡

ዝርዝሩን በተመለከተ እንዲህ በማለት ገልጸዋል – አቶ ነፃነት፡፡ “ዌል፣ እኔ ኖርማሊ ጧት ጧት ወደ ሥራ የምሄደው በዚህ የመለስ ፋውንዴሽን በሚሉት መንገድ አስታክኬ ነው – ብዙም የምታከክ ደግሞ እንዳይመስልህታዲያ፤ እናንት ጋዜጠኞች አንድን ነገር ኤግዛጀሬት እንደምታደርጉና ነገሮችን እንደምታዛቡ አውቃለሁ፡፡ እርግጥ ነው አክቹዋሊ እዚያ አካባቢ ስደርስ ወደፋውንዴሽኑ ማየትን አልወድም፡፡ ሰውዬው በቁሙ ያስጠላኝና የእናቴ ገዳይ ያህል እቆጥረው ስለነበረ በዚያ የማልፈው ደሜ እየተንተከተከ ነው – ዩዥዋሊ፡፡ ዛሬ ግን ለየት ያለ ነገር ታዘብኩና የመኪናየን ፍጥነት በረድ አድርጌ በመስኮት በኩል ስመለከት ከዐድዋ ድልድይ አቅጣጫ የመጣ የሚመስል አንድ ላንድክሩዘር በመናኸሪያ ሆቴል አቅጣጫ በኩል ከሚገኘው የፋውንዴሽኑ ዋና መግቢያ የበሩ ኮለን ጋር በመጋጨት በሩን ዘግቶ ቆሞ አየሁ – በትዕዛዝ በሩን ለመዝጋት የቆረጠ ይመስላል፡፡ ወደግቢው የሚወስደውን መንገድ ሙሉ በሙሉ በሚባል ደረጃ ዘግቶታል፡፡ ከሰው በቀር ወደግቢ መኪና አያስገባም – ለነገሩ ከዚያች ውሻ ሴት በስተቀር ሌላ ሰው ማን ሊገባ እንደሚችል አላውቅም – (ውሻ ማለቴን በዜናህ እንዳታቀርበው ታዲያ ፤ እናንተ እኮ አትታመኑም – አደራህን ኤዲት አድርገህ አውጣው ኦኬ?) ብዙ ሰዎችም ዙሪያውን ቆመው ጉድ ጉድ ይላሉ – “ድ” እንደማይጠብቅ አንባቢዎችህን ንገራቸው – አለበለዚያ ምን ድግስ ኖሮ ነው ‹ጉድ ጉድ› (አሁን ‹ድ› ይጠብቃል) የሚሉት እንዳይሉህ፡፡ እንደምገምተው ብዙዎቹ ሳይደሰቱ አልቀሩም፤ ግን በላይ ያዘኑ መስለው ሊፓቸውን ይመጣሉ – ‹እምጵ› እያሉ፡፡ ግጭቱ ከባድ ቢመስልም የተጎዳ ሰው ግን እንደሌለ አንገቴን በመስኮት አስግጌ የጠየቅሁት አንድ ሰው ነግሮኛል፡፡” በማለት ፋውንዴሽኑ ቢያንስ ያ ላንድክሩዘር እሰኪነሳ ድረስ ተዘግቶ እንደሚቆይ አስረድተዋል፡፡

“በዚህ በፋውንዴሽኑ መዘጋት ምን ተሰማዎት?” ተብለው የተጠየቁት አቶ ነፃነት ሲመልሱ “ኦፍ ኮርስ ምንም አልተሰማኝም ልልህ አልችልም፡፡ ግጭቱ ባይደርስ ደስ ይለኛል፡፡ በተለይ ከመጠነኛ የንብረት ዲስትራክሽን ውጭ የሰው ላይፍ ላይ ምንም ሃፕን ያደረገ ነገር ባለመኖሩ ደስ ብሎኛል፡፡ በት ኦን ዚአዘር ሃንድ ላንድ ክሩዘርን የመሰለ ሚጢጢየ ካር ኦር መኪና ኢፍ ዩ ላይክ ሳይሆን የሆነ ዩ ኖው የፋውንዴሽኑን ግቢ ብቻ የሚያህል ሜቴዎሮይድ ቢወድቅበትና ድራሽ አምላኩ ቢጠፋም የምጠላ ፐርሰን አይደለሁም – ኤግዛክትሊይ ኤ ካይንድ ኦፍ ዛት፡፡ ቱ ዩር ሰርፕራይዝ ይሄ ላንድክሩዘር በሩን እንዲህ ልክክ አድርጎ በግጭት ምክንያት መዝጋቱ ኢት ኢዝ ሪሊ ኦሚነስ – ማለቴ ምልኪያዊ ነው፡፡ ይህ ያልተጠበቀ ክስተት ግቢው በቅርቡ እንደሚዘጋና ለሌላ ፍሬያማ ተግባር እንደሚውል ይጠቁማል፡፡ ሶሪ እቸኩላለሁ፡፡ ሌላ ነገር ባትጠይቀኝ ደስ ይለኛል” በማለት ወደ ሥራቸው ለመሄድ ማቆብቆባቸውን በሰውነት እንቅስቃሴያቸው ቢጠቁሙም የያዛቸው ጋዜጠኛ ቀላል ባለመሆኑ “ጥሩ ነው፣ በንግግርዎ ጣልቃ እንግሊዝኛን የሚጠቀሙት ለምንድነው?” ሲል ጠይቋቸዋል፡፡ መልሳቸውም “ሂድና ኢቲቪን ጠይቅ፣ ሂድና ወያኔን ጠይቅ፣ ሂድና በየስብሰባውና በየዐውደ ጥናቱ በእንግሊዝኛና ዐማርኛ ጉራማይሌ በቅጹ ሳያውቅበት እያወለጋገደ የሚንተባተበውን ምሁርና ካድሬ ጠይቅ፣ ሂድና ስሙን ሲጠየቅ ባላስፈላጊ ሁኔታ ሳይቀር ‹አክቹሊ ስሜ ገረመው ነው› የሚል ዓይነት ጉራማይሌ ሠርክ የሚነገርባቸውን ኤፌሞች ጠይቅ፣ ሂድና የተማርኩ ነኝ የሚለውን ዜጋ በሙሉ ጠይቅ፣ ‹የሠራተኞች መጓጓዣ› ማለት አቅቷቸው አይደለም እንዴ ዐማርኛን በመጸየፍ ‹ፐብሊክ ሰርቪስ› የሚል የዐማርኛ ጽሑፍ ሰማያዊ አውቶቡሶች ላይ ለጥፈው የሚያስቁን? እኔስ ታዲያ ከማን አንሳለሁ? ሁ ማይነስ ሁ አንተ!?” በማለት በንዴት መልሰዋል፡፡ አሁን የቸኮልኩት እኔ ጋዜጠኛው ሆንኩ – እርሳቸው እንደሆኑ ሥራቸውንም ረስተው ከኔ ጋር ሲያወሩ ቢውሉ ደስተኛ ይመስላሉ፡፡

በተዋዛ አቀራረብ ላደረስንላችሁ ጮማ ሰበር ዜና ምሥጋና እንደሚገባን በሾርኒ በመጠቆም በሌላ – ከተገኘ – ሰበር ዜና እስክንገናኝ ደህና ዋሉ በማለት የምሰናበታችሁ –

ከመለስ ፋውንዴሽን ቅጽር ግቢ ውጪ የተጠናቀረውን ዜና ያቀረብኩላችሁ ነፃነት ዘለቀ ነኝ ከአዲስ አበባ

ማሳሰቢያ፡- ይህንን ዜና በምስል ማስደገፍ ያልተቻለው በዚያ አካባቢ ፎቶግራፍ ማንሣት ከጤና አኳያ ጎጂ ሆኖ በመገኘቱ መሆኑን ከይቅርታ ጋር ማሳሰብ እንወዳለን፡፡ ጎመን በጤና፡፡ ለሥራ ያልደረሱ፣ ለምግብ ያላነሱ ልጆችን ቀፍቅፎ ከጅብና ከዓሣማ ጋር አላስፈላጊ ልፊያ ውስጥ መግባት ብልኅነት አይደለም፡፡

እየሰመጠ ካለ መርከብ ራስን የማዳኛ ጊዜ አሁን ነው!

March 17,2016
(ከአርበኞች ግንቦት 7 ሥራ አስፈፃሚ ኮሚቴ የተሰጠ መግለጫ)

ዛሬ መጋቢት 8 ቀን 2008 ዓ.ም የአርበኞች ግንቦት 7 ለአንድነትና ዴሞክራሲ ንቅናቄ ሥራ አስፈፃሚ ኮሚቴ መደበኛ ስብሰባ አድርጎ በምክር ቤቱ የመጀመሪያ ጉባኤ የተላለፉትን ውሳኔዎች አፈፃፀም ገምግሞ፤ በሚቀጥሉት ሦስት ወራት ተግባራዊ ሊደረጉ የሚገባቸው ተግባራት ላይ ተነጋግሮ ውሳኔ አስተላልፏል። 

በሥራ አስፈፃሚው ግምገማ መሠረት፣ የኢትዮጵያ ሕዝብ የህወሓት አገዛዝ በሚያደርስበት በደል በቃኝ ካለ ቆይቷል፤ በዚህም ምክንያት ባገኘው አጋጣሚ ሁሉ በሥርዓቱ ላይ እያመፀ ነው። በኦሮሚያ፣ በአማራ፣ በጋምቤላ፣ በደቡብ፣ በአፋር፣ በጠቅላላው በሁሉም የኢትዮጵያ አካባቢዎች ሕዝባዊ እምቢተኝነት እየተቀጣጠለ ነው። የአዲስ አበባ የታክሲ ሾፌሮችና ባለንብረቶች እንዲሁም የረዥም ርቀት አውቶቡሶች አሽከርካሪዎች ያደረጉት የሥራ ማቆም አድማ ትግሉ ከፍ ያለ ደረጃ ላይ መድረሱን የሚያረጋግጡ ናቸው።

አርበኞች ግንቦት 7፣ የህወሓት አምባገናዊ አገዛዝ በትጥቅ ትግልና በሕዝባዊ እምቢተኝነት መወገድ እና በምትኩ የኢትዮጵያ ሕዝብ በነፃነት የመረጠው መንግሥት መተካት አለበት ብሎ ያምናል። በዚህም መሠረት በትጥቅ ትግሉ ዘርፍ የሚያደርገው ተጋድሎ ከዚህ በፊት ከነበረው በተሻለ አደረጃጀት ተጠናክሮ እንዲቀጥል፤ በየቦታው እየፈነዳዳ ያለው ሕዝባዊ እምቢተኝነት ተቀናጅቶ አገራዊ እንቅስቃሴ ሆኖ እንዲወጣ የትግል አቅጣጫ ነድፎ ተግባራዊ እንዲሆን ወስኗል።

የአርበኞች ግንቦት 7 ሥራ አስፈፃሚ ኮሚቴ በስብሰባዉ መጨረሻ የሚከተሉትን ጥሪዎች አድርጓል።

1. ለአርበኞች ግንቦት 7 አባላትና ደጋፊዎች
ወሳኝ በሆነ የትግል ወቅት ላይ እንገኛለን፤ በዚህ ወቅት በትጥቅ ትግሉ በቀጥታ ተሰልፈው ያሉት አባሎቻችን፣ በአገር ውስጥ በሕዝባዊ እምቢተኝነት በመሳተፍ ላይ ያሉ አባሎቻችንና ደጋፊዎቻችን እና በውጭ አገራት የሚገኙ አባሎቻችንና ደጋፊዎቻችን ሁሉ በአንድ ልብና መንፈስ ህወሓትን ከስልጣን የማስወገድ ሥራ ላይ እንዲረባረቡ ሥራ አስፈፃሚው ጥሪ ያደርጋል።

2. ለአገር መከላከያ ሠራዊት፣ ለፓሊስና የደህንነት አባላት
ነገ ከሚወድቅ ሥርዓት ጎን ቆማችሁ ወገኖቻችሁን ማጥቃት ተው！ የመሳሪያዎቻችሁ አፈሙዝ የሁላችንም ጠላት ወደሆነው አገዛዝ ይዙር！ ከወያኔ በኋላ በሚመጣው ሥርዓት የመከላከያ ሠራዊትና ፓሊስ መበተን የለባቸውም ብለን እናምናለን፤ ይህ እንዲሆን ግን ዛሬ ከአምባገነን ሥርዓት ጎን ሳይሆን ከሕዝብ ጎን ቁሙ።

3. ለህወሓት፣ ብአዴን፣ ኦህዴድ፣ ደህዴግ እና የኢህአዴግ አጋር ድርጅቶች አባላት
እየሰመጠ ካለ መርከብ ራሳችሁን አውጡ！ አባል የሆናችሁባቸው ድርጅቶች ለአገራችን ብቻ ሳይሆን ለእናንተም በግል የሚበጁ አይደሉም። ቢቻል በግልጽ፤ ካልተቻለም በስውር ድርጅቶቻችሁን በማዳከም የኢትዮጵያ ሕዝብ ትግልን አግዙ።

4. በኢትዮጵያ ዴሞክራሲያዊ ሥርዓት እንዲፈጠር ለሚታገሉ የፓለቲካና ሲቪክ ማኅበራት
በጋራ የምንቆምበት ወቅት አሁን ነው። ዛሬ የምናደርጋቸው ትብብሮች የረዥም ጊዜ ውጤት ያላቸው መሆኑን ተገንዝበን ኃይላችንን እንድናስተባብር ጥሪ እናደርጋለን።

5. ለመላው የኢትዮጵያ ሕዝብ
ጥያቄዎቻችን አካባቢ ተኮር ሊሆኑ ይችላሉ፤ ግባችን ግን የጋራ ነው። ከህወሓት አምባገነን አገዛዝ ነፃ የወጣች ዲሞክራሲያዊት ኢትዮጵያ እንድትኖረን ሁላችንም በአንድነት እንድንቆም የአርበኞች ግንቦት 7 ሥራ አስፈፃሚ ኮሚቴ ጥሪ ያደርጋል።
አንድነት ኃይል ነው！

The Fast Growing Economy? Ethiopian PM is Begging for Food

March 17,2016

Ethiopia Leader Calls for More Foreign Food Aid Amid Drought

(AP) — Ethiopia’s leader on Thursday urged the international community to donate more toward emergency food aid for millions of people amid a drought.

Ethiopia “should not be neglected by any means despite all the other crises that are going on elsewhere in the world,” Prime Minister Hailemariam Desalegn told The Associated Press in an interview.

“My country deserves more support because we are also sheltering some 750,000 refugees from neighboring countries that need food aid,” he said. “If something goes wrong, it is the international community who has not come in. The aid provided to us so far is very little and it often came very late. I urge organizations like UNICEF to come in if they think this is a worst case scenario. Just talking is not a solution.”

Aid agencies and the Ethiopian government say more than 10 million Ethiopians need urgent food aid and more than $1.4 billion is needed to deal with the crisis, with only half of that secured so far. The U.S. has been the biggest donor, giving more than $532 million in humanitarian assistance to Ethiopia since October 2014. The Ethiopian government has also spent about $380 million of its own money.

The drought was brought on by the El Nino climate phenomenon that affected seasonal rains, causing crops to fail and killing livestock.

Ethiopia was devastated by a drought in the 1980s exacerbated by a civil war that killed hundreds of thousands.

ቡና ሁነኛውን ደጋፊውን በፌደራል እጅ አጣ

March 15,2016

(ሳተናው) የአዲስ አበባ ስታዲየም ደምበኛ ከሆኑ የቂርቆሱን ልጅ ሽመልስ ጨርቆስን አያጡትም፡፡ቂርቆሶች በርህራሄው በደፋርነቱና ጥቃትን በመጠየፉ ያውቁታል፡፡የድንገተኛው ሞቱ ምክንያትም ይሄው ጥቃትን በሌሎች ሰዎች ላይ ሲደርስም ‹‹እንዴት ተደርጎ››ባይነቱ ነው፡፡

የፌደራል ፖሊስ ልብስ የለበሰ በወጣትነት የእድሜ ክልል ውስጥ የሚገኝ አንዲት ሴትን መንገድ ላይ በማስቆም አብራው እንድትሄድ ይጠይቃታል ልጅቷ ፈቃደኛ አልሆነችም፡፡

የልጅቷንና የፌደራል ፖሊሱን ሁኔታ ሲከታተል የነበረው በቀድሞው ወረዳ 21 ቀበሌ 13 ነዋሪ የነበረው ሽመልስ ፖሊሱን ልጅቷን ያለፍላጎቷ ምንም ሊያደርጋት እንደማይችል በመግለጽ ባይሆን በእርጋታ እንዲያናግራት ለማግባባት ይሞክራል፡፡ፌደራሉ ግን ብቻውን አልነበረምና በተደፈርኩ ባይነት ከጓደኞቹ ጋር በመሆን ድብደባ ይፈጽሙበታል፡፡ሽመልስ የደረሰበትን ድብደባ መቋቋም ባለመቻሉም ህይወቱ ማለፉ ታውቋል፡፡
ሽመልስ ላይ ግድያ በተፈጸመበት አካባቢም ከሁለት አመት በፊት አንድ ፌደራል ፖሊስ አንዲት ሴተኛ አዳሪን እንዴት ከእኔ ሌላ ወንድ ትይዣለሽ በማለት በጥይት ደብድቦ መግደሉና አብሯት የነበረውን ማቁሰሉ አይዘነጋም፡፡በአካባቢው በሚገኘው ካምፕ የሰፈሩ የፌደራል ፖሊስ አባላት በቂርቆስ አቅራቢያ በሚገኙ መንደሮች የሚኖሩ ሴቶችን በማስፈራራት ፣የሚያስቸግሯችሁን እናስራለን በማለትና በተለያዩ መንገዶች እንደሚያስቸግሯቸው መረጃዎች ይጠቁማሉ፡፡በወረዳው ለሚገኝ የፖሊስ ጣቢያም ተደጋጋሚ አቤቱታዎች ቢቀርቡም ምንም አይነት ምላሽ ባለመገኘቱ ነዋሪዎች መቸገራቸውን ይገልጻሉ፡፡
በፌደራል ፖሊሶቹ በደረሰበት ድብደባ ህይወቱን ያጣው ሽመልስ ጨርቆስ በዛሬው ዕለት የቀብር ስነስርዓቱ የተፈጸመ ቢሆንም ይህ ዘገባ እስከተሰራ ድረስም በፌደራል ፖሊሶቹ ላይ የተወሰደ ምንም አይነት እርምጃ የለም፡፡
ምንጭ የቂርቆስ ልጆች

አለም የዘነጋው ጩህት ‹‹ምንም የምንበላው ነገር የለንም››

March 14,2016
ገነት ታምራት የሁለት ወር ልጇን ጭንቅላትን በስቶ ከሚገባው ጸሐይ ለመከላከል በሁለት እጆቿ እየጋረደችው ተቀምጣለች፡፡ ለልጇ የሚደረግለትን የአልሚ ምግብ ድጋፍ ከሌሎች በመቶዎች ከሚቆጠሩ እናቶች ጋር በትእግስት እየተጠባበቀች ነው ፡፡በ50 ዓመታት ታሪኳ ውስጥ እንዲህ አይነት አስከፊ ድርቅ አስተናግዳ በማታውቀው ኢትዮጵያ የሚገኙ እናቶች ለልጆቻቸው የሚሰጡት በማጣታቸው ህጻናቱ በአልሚ ምግብ እጦት በመሰቃየት ለተለያዩ በሽታዎች በቀላሉ እየተጋለጡ ይገኛሉ፡፡ ‹‹በቤቴ ውስጥ ምንም የሚበላ ነገር የለኝም፣ሌላው ቀርቶ በቆሎ እንኳን ለራሴ መግዛት አልችልም››የምትለው ገነት የአራት ዓመት ወንድ ልጅም አላት ‹‹ሰዎች ውጫዊ ሁኔታችንን ተመልክተው ደህና እንደሆንን ሊያስቡ ይችላሉ ነገር ግን በትልቅ አደጋ ውስጥ እንገኛለን ምንም ነገር የለንምና ››ትላለች፡፡

የሚጠጣ ውሃ በጠፋበትና የምግብ እጥረት በከፍተኛ ደረጃ በተከሰተበት ፈታኝ ወቅት ውስጥ ገነትና በሚልዩኖች የሚቆጠሩ ኢትዮጵያዊያን የሚገኙ ቢሆንም ጉዳዩ በአለም አቀፍ ደረጃ ተገቢውን ትኩረት እያገኘ አለመሆኑ መጪውን ጊዜ የበለጠ አስፈሪና አስጨናቂ ያደርገዋል፡፡
10.2 ሚልዩን ኢትዮጵያዊያንን ለመመገብ እስካሁን 1.4 ቢልዩን ዶላር ያስፈልጋል ተብሏል ፡፡ነገር ግን የተገኘውና ተስፋ የተገባው
የሚፈለገውን ግማሽ ያህል እንኳን አልሆነም፡፡አለም ከኢትዮጵያ ይልቅ ፊቷን አውሮፓን እያጥለቀለቃት ለሚገኘው የስደተኞች ጎርፍ፣ለየመንና ለሶሪያ ቀውሶች መስጠትን ምርጫዋ አድርጋለች፡፡
የቻይልድ ፈንድ ኢትዮጵያ ዳይሬክተር የሆኑት ቼጌ ጉጊ ‹‹ለችግሩ እየተሰጠ የሚገኘው ምላሽ በጣም ዘገምተኛ ነው፡፡የእኔ ኃላፊነት ህይወትን ለማዳን የኢትዮጵያን መንግስት አቅም መደገፍ ቢሆንም ሁሉንም መድረስ አልቻልንም››ይላሉ፡፡
የአገሪቱን 85% ህዝብ የሚመግበው ግብርና በጠንካራው ኤልኒኖ የተነሳ ለሁለት ተከታታይ አመታት ዝናብ ማግኘት ባለመቻሉ መንግስትን አሜሪካንን ጨምሮ ሌሎች ለጋሾችን የምግብ እርዳታ ለመጠየቅ አስገድዶታል፡፡
የአሜሪካ መንግስት በቅርቡ ለአደጋው ምላሽ የሚሰጥ ቡድን ወደኢትዮጵያ መላኩን አስታውቋል፡፡ቡድኑ 4 ሚልዩን ዶላር የተገመተ የበቆሎና የስንዴ እርዳታ ለ200.000 ቤተሰቦች እንደሚያደርግም ተነግሯል፡፡
በኦሮሚያ ክልል የኢትዮጵያን መካከለኛ ክፍልም ያጠቃልላል አይናችሁ ማየት እስከቻለ ድረስ የምትመለከቱት መሬት በዝናብ እጦት ክፉኛ የደረቀ ነው፡፡በእነዚህ ቦታዎች የሚገኙ እንስሳትም አጥንታቸው ጎላ ብሎ የሚታይና የጠወለጉ ናቸው፡፡ባለፈው ዓመት የእርዳታ ድርጅቶች የተነበዩት የተረጂዎች ቁጥርም በአካባቢው በዚህ ወቅት በሶስት እጥፍ አድጓል፡፡
በድርቁ በከፍተኛ ሁኔታ በተጎዱ አካባቢዎች የአለም አቀፉ የጤና ድርጅት ትንበያ የነበረው የአልሚ ምግብ የሚያስፈልጋቸው ህጻናት ቁጥር በ20% ተመንድጓል የሚሉት የአለም አቀፉ የምግብ ፕሮግራም ቃል አቀባይ ካሊስ ማክዶን ናቸው፡፡
በዚህ ዓመትም የምግብ ፕሮግራሙ 2 ሚልዩን ልጆችን፣እርጉዞችንና የሚያጠቡ እናቶችን ለመርዳት እቅድ መያዙን ማክዶን ይናገራሉ፡፡
ዩኒሴፍ በበኩሉ ባቀረበው ትንበያ 500.000 ህጻናት አልሚ ምግብ በማጣት የተነሳ ለሚከሰት የጤና ችግር ይዳረጋሉ ብሏል፡፡
‹‹ሌላው ቀርቶ ድጋፍ እየተደረገም ሁኔታው እየተባባሰ ነው ››የሚሉት ደግሞ በፈንታሌ የቻይልድ ኢትዮጵያ ሰራተኛ ኢዮኤል ለማ ናቸው፡፡
ኢዮኤል ድርጅታቸው ከተባበሩት መንግስታት በሚያገኘው ድጋፍ እየታገዘ ከአምስት ዓመት በታች ለሚገኙ ህጻናት የአልሚ ምግብ እርዳታ ሲያደርግ መቆየቱን ይገልጻሉ፡፡ነገር ግን በተከታታይ ለልጆቻቸው አልሚ ምግቦቹን መውሰድና የሚሰጣቸውን ህክምና መከታተል ሲገባቸው ወላጆቻቸው ወደሌሎች አካባቢዎች ውሃ፣ምግብና ስራ ፍለጋ ስለሚሄዱ ስራቸውን አስቸጋሪ እንዳደረገባቸው ይጠቅሳሉ፡፡በዚህ ምክንያትም በሬሽን የሚከፋፈለውን ምግብ ብዙ ቤተሰቦች እንደሚያመልጣቸው ይናገራሉ፡፡
በእንቅስቃሴ ላይ ከሚገኙ ወላጆች አንዷ የ27 ዓመቷ ቡልቱ ሃሶ ትጠቀሳለች፡፡ለሰዓታት አናትን ከሚበሳው ጸሐይ እየታገለች አስቸጋሪውን ተራራ ታክካ ውሃ ፍለጋ ፈንታሌ ደርሳለች፡፡ቡልቱ ይህን ጉዞ ስታደርግ የ9 ወር ህጻን ልጇን በጀርባዋ አዝላለች፡፡
‹‹በጣም አስቸጋሪ ነው፡፡ምንም እንቅልፍ አልነበረኝም፣ ምክንያቱም ለእንስሳቶቻችን የተወሰነ ምግብ መፈለግ ነበረብኝ ፡፡ህይወታችንን ለማቆየትም ያለማቋረጥ መጓዝ ይኖርብናል››ብላለች፡፡
ኢትዮጵያ በማደግ ላይ ከሚገኙ የአለማችን አገራት አንዷ ተደርጋ ስትጠቀስ ብትቆይም እውነታው ግን 80% የሚሆኑት ኢትዮጵያዊያን የግብርናው ጥገኛ መሆናቸው ነው ፣ግብርናው ደግሞ የዝናብ ጥገኛ ነው፡፡የአለም ምግብ ፕሮግራሟ ማክዶን ድርጅታቸው በቀጣይ እርዳታ ማግኘት ካልቻለ በሁለት ወራት ውስጥ ያለውን በማጠናቀቅ ባዶ እጁን እንደሚሆን ያስጠነቅቃሉ፡፡
‹‹ለወራት አስቸኳይ እርዳታ ለማግኘት በማሰብ ጥሪ ስናደርግ ቆይተናል፡፡እጃችን ላይ የሚገኘው ግን ለቀጣዩቹ ስድስት ወራት ያስፈልገናል በማለት ከምናስበው ሩብ ያህሉን ብቻ ነው፡፡በጣም በቅርቡ አዲስ እርዳታ ማግኘት ካልቻልን በግንቦት ወር ያለንን በማጠናቀቅ ድጋፍ መስጠታችንን እናቆማለን››ማለታቸውን ቢቢሲ ዘግቧል፡፡
ዩኒሴፍ ባወጣው ሪፖርትም ከምግብ እጥረቱ ጎን ለጎን 6 ሚልዩን ሰዎች አስቸኳይ የመጠጥ ውሃ እርዳታ እንደሚያስፈልጋቸው አውስቷል፡፡በፈንታሌ በሚገኝ አንድ የእርዳታ ድርጅት የሚሰሩት ሳሙኤል ፈርፉ የአካባቢው ሌላኛው ዋነኛ ችግር ውሃ ነው ይላሉ፡፡
‹‹በአጠቃላይ ውሃ የለም ማለት ይቻላል፣ ወንዞቹ በሙሉ ደርቀዋል፡፡ውሃ በሌለበት ሁኔታ ደግሞ ህይወትን አስቸጋሪ ያደርገዋል ያደርገዋል፡፡በዚህ ምክንያትም የሰዎች በበሽታዎች የመጠቃት ዕድላቸው ይጨምራል››ብለዋል ኢዮኤል፡፡
ለጊዜው ኢትዮጵያዊያኑ በጣም በተጎዱት አካባቢዎች ዝናብ መጣል እንዲጀምር በጸሎት ተጠምደዋል፡፡ነገር ግን ለረዥም ጊዜ ዝናብ ጠፍቶ ሲመጣ ጎርፍ ሊፈጠር እንደሚችል ብዙዎች ይሰጋሉ፡፡
ኢዩኤል ‹‹በቅርቡ ዝናብ ይመጣል በመባሉ ሰዎች ጎርፍ ሊከሰት ይችላል በማለት ይሰጋሉ፡፡ነገር ግን ጎርፉ ቢመጣ እንኳን ከመኖሪያ ቤታቸው ውጪ የሚያጡት ምንም ነገር የቀራቸው የለም፡፡እንስሳቶቻቸውንና እርሻዎቻቸውን እንደሆነ ቀደም ብለው አጥተዋቸዋል››ብለዋል፡፡
ለ27 ዓመቷ ገነትና ለታዳጊው ልጇ ዝናብ በቅርቡ ይመጣል መባሉ የውሸት ተስፋ ነው፡፡‹‹ምግብና ውሃ የለንም፣ስለወደፊቱ ምን ሊፈጠር እንደሚችል አላውቅም ስለዝናቡ መምጣትም ቢሆን ምንም ተስፋ የለኝም››ትላለች፡፡
ምንጭ ዩኤስኤ ቱይ

ህወሃት – 9 ስደተኞችን ደብዳቤ ጽፎ ከአሜሪካ ወሰዳቸው

March 11,2016

“ከህወሃት በላይ በራሳችን አዝኛለሁ” ኦባንግ ሜቶ

ከተለያዩ አገራት አሜሪካ ገብተው የስደት ማመልከቻ ያስገቡ 9 ኢትዮጵያውያንን ህወሃት ተረከቦ ወደ አገር ቤት እንደወሰዳቸው ታወቀ። አንዱ ራሱን ለማጥፋት ሞከሮ ነበር። ወደ ኢትዮጵያ ቢሄድም የጤናው ሁኔታ አልታወቀም። ድርጊቱን አስመልክቶ አቶ ኦባንግ ሜቶ “ከህወሃት ተግባር በላይ በራሳችን አዝኛለሁ” ሲሉ ወጣቶቹን ለማዳን ያደረጉት ጥረት መረጃው ዘግይቶ ስለደረሳቸው አለመሳካቱን አመለከቱ።

“ለቤተሰቦቼ የት እንዳለሁ እንኳን ነግሬያቸው አላውቅም” ሲል የተናገረውን ወጣት ጨምሮ ህወሃት የተረከባቸው ኢትዮጵያዊያን ወግኖች አሜሪካ ለመድረስ እስከ 14 ወራት ፈጅቶባቸዋል። በብራዚል፣ በኮሎምቢያ ጫካ አቋርጠው፣ በፓናማ ወንዝ ተሻግረው፣ በሜክሲኮ አድርገው በአጠቃላይ እስከ 16 የሚደርሱ አገራትን አልፈው በተለያዩ መንገዶቸ አሜሪካ ደርሰው ጥገኝነት የጠየቁት ወገኖች ህጉ ከሚፈቅደው ውጪ ከስድስት ወር በላይ በፍሎሪዳ ጠቅላይ ቅዛት ማያሚ እስር ቤት መቆየታቸውን ለአቶ ኦባንግ በአስራ አንደኛው ሰዓት የላኩት “የድረሱልን” ደብዳቤ ያስረዳል። መረጃቸው እንደሚያመለክተው ከተለያየ የኢትዮጵያ ክፍል የመጡት ወገኖች በፍሎሪዳ እስርቤት ከአንድ ወር እስከ አመት ተኩል ድረስ በእስር ቆይተዋል፡፡

አቶ ግርማ ብሩ የሚመሩት የህወሃት የአሜሪካ ቢሮ ስደተኞቹ ቢመለሱ ምንም አይሆኑም፣ ምንም አይደርስባቸውም፣ ሰላማዊ ኑሮ መኖር ይችላሉ፣ ወዘተ በማለት በጻፈው ደብዳቤና አዘጋጅቶ በሰጠው የመጓጓዣ ሰነድ አማካይነት ወጣቶቹ ተላልፈው ሊሰጡት ችሏል።

ህወሃት በኤርትራዊነት መታወቂያ የራሱን ወገኖች ለስደት በምዕራባውያን አገራት እየላከ ኢትዮጵያውያንን ሲያሰልል፤ በባህርና በበረሃ ተንገላተው አሜሪካ የገቡትን ምስኪን ዜጎች ላይ የወሰደው ርምጃ “ዲያስፖራውን የመበቀያ አንዱ አካል ነው” ተብሏል።

“ኑሮዬ ሳይስተካከል ለቤተሰቦቼ የት እንዳለሁ እንኳን አላሳውቅሁም። እናትና አባቴ ልሙት፣ ልኑር አያውቁም፤ ከተለየኋቸው ጊዜ ጀምሮ ስልክ ሳልደውል አራት አመት ከ11 ወራት አልፈውኛል” ሲል ለአቶ ኦባንግ የድረሱልኝ ጥሪ ካሰሙት ወጣቶች አንደኛው ተናግሯል፡፡ ዘጠኙ በአንድነት ተላልፈው ከመሰጠታቸው ጥቂት ቀናት አስቀድሞ ነበር አቶ ኦባንግ ደብዳቤያቸው የደረሳቸውና ጉዳዩን የሰሙት።

“እንደሰማሁ” አሉ አቶ ኦባንግ “ወዲያውኑ ስደተኞቹን የሚወክል ጠበቃ ያዝኩ። የወጣቶቹ ከስድስት ወር በላይ መታሰር ከህግ አንጻር አግባብ ባለመሆኑና ስደተኞቹ ሊመለሱ እንደማይገባ ለማውቃቸው እንደራሴዎችና ሴናተሮች በማስረዳት የእስር ውሳኔ ላስተላለፉት ዳኛ ደብዳቤ ሊላክ የሰዓታት ዕድሜ ሲቀር መርዶውን ሰማሁ” ብለዋል፡፡

ለወትሮው ረጋ ብለው በመናገር የሚታወቁት ኦባንግ “ለአንድ ቀን ተቀደምን” ሲሉ በቁጣ ነበር ስሜታቸውን የገለጹት። የጎልጉል የአሜሪካ ዘጋቢ ያነጋገራቸው አቶ ኦባንግ ቁጣቸውን ሊደብቁ በማይችሉበት ሁኔታ “ከህወሃት በላይ በራሳችን አዘንኩ” ብለዋል። “ለምን?” በሚል ለቀረበላቸው ጥያቄ ሲመልሱም “በተመሳሳይ መንገድ ተሰድደው፣ ታስረው፣ ዛሬ በመልካም ሁኔታ ላይ ያሉ ወገኖች የ5 ሺህ ዶላር ዋስ ሆነው ልጆቹን ማስፈታት ይችሉ ነበር ። ዳሩ ምን ያደርጋል ሁላችንም መነሻችንን እንረሳለን” ሲሉ ጉዳዩን አስቀድመው የሚያውቁ ወገኖች ላሳዩት ቸልተኛነት ወቀሳ ሰንዝረዋል።

“አቶ ግርማስ ቢሆኑ” አሉ አቶ ኦባንግ “ይህን ደብዳቤ እንዴት ይጽፋሉ? ወይም ሲጻፍ እንዴት ዝም ይላሉ? የጉዞ ሰነዱ ተሰርቶ እንዲላክስ ለምን ይፈቅዳሉ? ምንም ቢሆን እርሳቸው ሳያውቁ የሆነ ነገር የለም፤ ኅሊና ካላቸው በጣም ሊያፍሩበት ይገባቸዋል፤ እርሳቸውም ሆኑ አብረዋቸው የሚሰሩት ራሳቸውን በእነዚህ ልጆች ጫማ አስገብተው ማየት ይገባቸው ነበር፤ እነርሱ አገልግሎታቸውን ሲጨርሱ እዚሁ ከነቤተሰቦቻቸው ጥገኝነት ጠይቀው ኑሯቸውን ይቀጥላሉ፤ በአየር፣ በምድር፣ በወንዝ በስንት ስቃይና መከራ እዚህ የደረሱትን ልጆች ግን ደህና አገር እንዳለው የጉዞ ሰነድ ልከው ባዶ እጃቸውን ወደመጡበት እንዲመለሱ ያደርጋሉ፤ ይህ ወራዳና አጸያፊ ተግባር ነው፤ አገሪቱን ወይ በትክክል አያስተዳድሩ ወይ አገሩን ለቅቀው የሚወጡትን የፈለጉበት እንዳይኖሩ በሩ ይዘጋሉ፤ ኅሊና አለኝ ለሚል ሰው ይህ እጅግ አሳፋሪ ነው” ሲሉ ይወቅሷቸዋል።

ከስደተኞቹ መካከል አንዱ ወጣት በአገር ውስጥ የሚካሄደው ሰቆቃ ያስመረረው ከመሆኑ የተነሳ ወደ ኢትዮጵያ ከሚመለስ በአሜሪካ እስርቤት ለመሞት እንደሚመኝ መናገሩን አቶ ኦባንግ ጠቁመዋል፡፡ “በረሃና ወንዝ ስናቋርጥ በርካታ ወንድምና እህቶቻችንን አጥተናል፤ ማንም ስለ እነርሱ ግድ ያለው የለም፤ ታዲያ ለምን ለኛ ግድ ያላቸው ለመምሰል ይሞክራሉ” በማለት እንዳወራላቸው አቶ ኦባንግ ጠቅሰዋል፡፡

አገር ቤት ስራ አለመኖሩን፣ ችጋር፣ ረሃብና ድርቅ ዜጎችን እየጠበሰ መሆኑንን፣ እስርና ግድያ፣ አፈና ባለበት ሁኔታ እነዚህን ምስኪኖች ሰብስቦ መውሰድ ህወሃት ዲያስፖራውን ከመበቀል ያለፈ ትርጉም እንደሌለው በመግለጽ ዜጎች ከወዲሁ ጥንቃቄ ሊያደርጉ እንደሚገባ አመልክተዋል።

የአሜሪካ እንደራሴዎች ምክርቤት አባላት ደብዳቤ ለመጻፍ ቃል ገብተው፣ ጠበቃ ተገኝቶ ወጣቶቹን ለማስፈታት የሚያስችል ርምጃ ከመጀመሩ አንድ ቀን በፊት በተፈጸመው ድርጊት ክፉኛ ማዘናቸውን የጠቆሙት ኦባንግ ሜቶ አሁንም እስር ላይ ያሉትን ለማስፈታት ጥረታቸውን እንደሚገፉበት ተናግረዋል። ከእንግዲህ ጉዳዩ የህወሃት ወይም በዋሽንግተን ዲሲ ያስቀመጠው ጽ/ቤቱ አይደለም፤ ጉዳዩ የራሳችን ነው የሚሉት “ጥቁሩ ሰው” ኦባንግ “ህወሃት የጉዞ ሰነድ እያዘጋጀ የራሱ ጽ/ቤት ባደረገው ኤምባሲው አማካኝነት እየሰጠ ስደተኞች ላይ የሚፈጽመው ይህ ተግባር የሚቆምበት ሁኔታ ከእንደራሴዎች ጋር በመነጋገር ተጽዕኖ የማድረግ ሥራ” ካሁኑ መጀመሩን ሳይጠቁሙ አላለፉም፡፡

ኦባንግ ስደተኛ ወገኖች ባሉበት ሁሉ ፈጥነው በመድረስና አለኝታ በመሆን የሚታወቁ ኢትዮጵያዊ መሆናቸውን ዜጎች የአደባባይ ምስክርነት በ“ቃላቸው” ብቻ የሚሰጧቸው ሰው መሆናቸው የሚዘነጋ አይደለም።

ከጠመንጃ ‘ነፃነት’ ወደ ስኳር ባርነት! | ታሪኩ አባዳማ

March 9,2016

ታሪኩ አባዳማ – የካቲት 2008

ለስኳር ማምረቻ ፋብሪካዎች ማስፋፊያ በሚል ሰበብ መጠነ ሰፊ መሬት ከዜጎች እየተዘረፈ መሆኑን ስንሰማ ቆይተናል። የታሪክ እና እምነት መናኸሪያ ዋልድባ ገዳም በይዞታው ስር የሚገኘውን ርስት በዚህ ምክንያት መቀማቱንም እንደ ዋዛ ሰምተን ነበር። ሰሞኑን በምናገኘው ወሬ ደግሞ የኦሞ ሸለቆ ልዩ ልዩ ብሔረሰብ ኢትዮጵያውያን ከክልላቸው ጭካኔ በተመላበት የወያኔ አስገድዶ ማፈናቀል ዘመቻ ከቄያቸው ሲጋዙ መክረማቸውን ተረድተናል። መሬታቸው ለሸንኮራ እርሻ ማምረቻ እና ስኳር ፋብሪካ ስለተመረጠ እነሱ ወዳልመረጡት አካባቢ በጠመንጃ አፈሙዝ ተገደው ተወስደዋል።

እንደ እንሰሳ በገመድ ተጠፍሮ ካሚዮን ላይ የተጫነውን ወገናችንን አተኩራችሁ ካስተዋላችሁ በስኳር ገበያ የጎመዘዘው የኦሞ ሸለቆ ክልል ህዝቦች ህይወት ስዕል ቁልጭ ብሎ ይታያችሁዋል። ስኳር የሚልሱ ጉልበተኛ ገዢዎች በዜጎች ጉሮሮ እንቆቆ እያንቆረቆሩ ስለመሆኑ በማያሻማ ሁኔታ ትገነዘበላችሁ። ለም የተባለ ያገሪቱ ምድር እንደ ጠላት ወረዳ ወረራ እየተፈፀመበት የይዞታው ባለቤት የሆኑ ነዋሪዎቹ ወደ ዘቀጠ ኑሮ እየተወረወሩ ይገኛሉ። በዚህም የወያኔ እውነተኛ ተፈጥሮ ይበልጥ ግጥጥ ብሎ ወጥቷል።

በመሰረቱ የዚህ አይነቱ ጭካኔ በወያኔ ወህኒዎች በታገቱ ንፁሀን ዜጎች ላይ ሲፈፀም የቆየ በመሆኑ ለብዙዎቻችን እንግዳ ነገር አይደለም። ምናልባት ይህን የተለየ የሚያደርገው በጠመንጃ አፈሙዝ ብሔረሰባዊ ነፃነታችሁ ተረጋግጧል የተባሉት ኢትዮጵያውያን በስኳር ኢንቨስተሮች ጡንቻ እውነተኛ ባርነት ተጭኖባቸው ማየታችን ሊሆን ይችላል –

ወያኔ በስኳር ገበያ ሊከብር ፣ ሊናጥጥ ፤ የወያኔ ጀሌ በስኳር ህይወቱን ሊያጣፍጥ ሌላው ዜጋ አያት ቅድም አያቱ ከተከሉት ከገዛ መሬቱ ላይ በወታደር ተገዶ ይጋዛል – እንደ ከብትም ታስሮ ፣ ተወግሮ እና ተዋክቦ ፤ ስብእናው ተክዶ እና ተዋርዶ የህይወት ተስፋው ጨልሞ ደብዛው እንዲጠፋ ሲደረግ ቆይቷል።

ስኳር መራራ የሆነበት ዜጋ ሆነን የመገኘታችን ምስጢር መፍትሔ ያሻዋል።

የኦሞ ሸለቆ ሰላማዊ ዜጎች ለም መሬታቸውን መቀማታቸው አልበቃ ብሎ በቁማቸው አሳር እንዲቀበሉ በመደረግ ላይ ነው። ወልቃይት ላይ የተፈፀመውን አይን ያወጣ ወረራ ስናስብ ፣ በኦሮሞ ክልል የተፈፀመው የመሬት ዘረፋ እና ማፈናቀል ፣ ጋምቤላ አፅመ ርስቱን የተቀማው ህዝብ – ይህ ሁሉ ድርጊት አፈፃፀሙ ወጥነትና እና ተመሳሳይነት እንዳለው መገንዘብ አያዳግትም። የዚህ እርምጃ ግብ አንድ ጠገብኩ የማይል ስግብግብ ጎጠኛ ሀይል መጠነ ሰፊ ሀብት አግበስብሶ አገዛዙን አለገደብ ማራዘም እንዲበቃ ማስቻል ነው።

ወያኔ የስልጣንና ሀብት ጥሙን ለማርካት ሲል ይሉኝታ የማያውቅ ፣ ስለ ዜጎች ደህንነት ቅንጣት ሀላፊነት የማይሰማው ፣  የሚሊዮኖች ህይወት ቢናጋ ፣ ሰብአዊ ክብራቸው ቢዋረድ… ብሎም ኢትዮጵያ ራሷ ከገፀ ምድር ብትጠፋ ቅም የማይለው መሆኑን በወሬ ሳይሆን በተግባር ሲያሳየን ቆይቷል። ይኼ ዛሬ ያየነው  ድርጊት ሌላ ተጨማሪ ኤግዚቢት ነው። የብሄረሰቦችን እኩልነት አውጃለሁ ብሎ ዘገር የነቀነቀው ባለ ቁምጣ የብሄረሰቦችን ለም መሬት በዘገር እየቀማ ለባርነት እየዳረጋቸው ነው።

የኦሞ ሸለቆ በሞላሰስ አተላ ሲበከል አናይም ያሉ ዜጎች ደማቸው እንደ ጅረት እየፈሰሰ ነው። በወያኔ ወታደር ተገደው ካሚዮን ላይ የተጫኑትን ወገኖቻችንን አካል አስተውሉት ፣ እርቃን ገላቸውን በህሊናችሁ ዳሱት ፣ የፊታቸውን ገፅ አንብቡት ፣ አይናቸውን እዩት – ከግንባራቸው የሚፈሰውን ላብና ደም አስተውሉት… – አንገታቸው ላይ የተሸመቀቀውን ገመድ ፣ ክንዳቸው የፊጥኝ ተሰትሮ መተንፈሻ እንኳ ተነፍገው በጨካኝ ወታደር እርግጫ የሚደርስባቸውን ሰቆቃ አሰላስሉት… እዚህ ፎቶ ላይ ያየናቸው ዜጎች በጥይት ተገድለው በየስርቻው ከተጣሉት የተረፉት መሆናቸውንም አስቡት… ።

አንድ ህዝብ በገዛ አገሩ ይህ ሁሉ ሰቆቃ በቁሙ የሚፈፀምበት ለስንት ስኳር ላሾች ምቾት ሲባል ይሆን?

በማህበራዊ መገናኛ አውታሮች የተለቀቁትን ምስሎች ሳስተውል እስከ አጥንቴ ዘልቆ የሚወጋ ህመም ተሰምቶኛል። ወያኔ ወደ አስራስድስተኛው መቶ ክፍለ ዘመን የመሳፍንት ዘመን ይዞን የሄደው በፖለቲካ ብቻ ሳይሆን በዚያው በጥንታዊው ዘግናኝ የባሪያ ንግድ ዘዴ አፍሪካውያን የደረሳባቸውን ሰቆቃ በመድገም ጭምር መሆኑን ተገነዘብኩ። ይሄ ነጮቹ barbaric (አረመኔ) የሚሉት ባህርይ ነው። በኔ እምነት ወያኔ በተፈጥሮው barbaric ብቻ ሳይሆን beast (አውሬ) መሆኑን ተገንዝቤያለሁ።

አንድ ኢትዮጵያዊ በገዛ ቄየው እንዲህ እርቃኑን እንደ ከብት ተጠፍሮ ሲንገላታ በአይንህ ብሌን ከመመስከር በላይ ወያኔን የሚገልፅ ምን ትጠብቃለህ። ወደድንም ጠላንም የሚካሄደው ትግል ይህን የባርነት ቀንበር ለመስበር የሚደረግ ተጋድሎ ነው። ይህን ለአፍታ የሚጠራጠር ካለ ሌላ ከዚህ የባሰ ተጨማሪ የዜጎች ውርደት እስኪመጣ ለመጠበቅ የመረጠ ብቻ ነው። ይህም ባርነትን ወዶ እንደ መቀበል ይቆጠራል።

አውሬ ህሊና የለውም – ወያኔ ህሊና የለውም!

ኦሮሞ መሬት ላይ ህፃን ከአዛውንት ፣ ነብሰጡር እናቶች ፣ ለጋ ወጣት ተማሪዎች እና አርሶ አደሮች… ማንም አልቀረውም – ሁሉንም በአውሬ ተፍጥሮው ፣ በመርዛም ጥርሱ ነክሷል… እየነከሰ ነው። ያየናቸው ምስሎች ሀፍረታቸው እንኳ በወጉ ሳይሸፈን በገመድ የፊጥኝ ታስረው በካሚዎን ላይ የታጨቁ ምሬት የተላበሱ ኢትዮጵያውያን በወታደር ሀይል እየተዋከቡ ወደማይውቁበት ስፍራ እየተጋዙ መሆኑን ነው። እነኝህ ዜጎች ምናልባትም በታሪካቸው ከዚህ ቀደም ደርሶ የማያውቅ ጭካኔ እየተፈፀመባቸው ነው። መላ የሰው ዘር ባርነትን በተጠየፈበት በሀያ አንደኛው ክፍለ ዘመን ነፃነቱን ለምዕተ ዓመታት አስከብሮ የኖረ ህዝብ መልሶ ወደ ባርነት ስርአት ሲገባ ከማየት በላይ ህሊናን የሚያቆስል ጉዳይ የለም።

ኢትዮጵያውያን በባርያ ፈንጋይ እጅ ወድቀናል። ትግላችንን የነፃነት ጥያቄ የሚያደርገውም ይኸው ነው።

ወገኖቻችን በባርነት ቀንበር ስር እየማቀቁ ሳሉ አንዳችንም ከባርነት ነፃ ነን ማለት አንችልም። እንዲህ  አይነቱን አሳፋሪ እና ፀያፍ አውሬአዊ ድርጊት ከምድራችን ለመፋቅ ባለን አቅም እና መንገድ ሁሉ መታገል አማራጭ የለውም።

ተንበርክኮ መኖር ያሳፍራል። የዜጎች ክብር የተዋረደባት ፣ አሳፋሪ አገር ለዛሬውም ሆነ ለነገው ትውልድ አያሻንም። በኢትዮጵያዊነቴ እኮራለሁ እያልን ዜጎቿ ከተራ ሰብአዊ ፍጡር በታች ተዋርደው መሳለቂያ ሲሆኑ ማየት ትልቅ የህሊና ቁስል ነው። ምኑ ነው የሚያኮራን ፣ የኩራታችን ምንጭ የዜጎቻችን ክብር ካልሆነ ሌላ ምን ሊሆን ይችላል?

የመለስ ዜናዊ ራእይ

March 7,2016

መለስ ዜናዊ ለኢትዮጵያ ማን ነው?

መለስ ዜናዊ ለኢትዮጵያ የጠላት ጠላት ደመኛ ጠላት ነው። ከአባቱ፣ ከእናቱና ከአያቶቹ የወረሰው በኢትዮጵያና በሕዝቧ ላይ የፈጸመው ግፍ፤ የሃገር ማፍረስ ድርጊት በታሪክ የማይረሳ ነው። እሱ ብቻ ሳይሆን የህወሓት አመራርንም ይጨምራል። የስም ዝርዝራቸውን በተለያዩት ጽሁፎቼና ከዚህ በላይም ስላካተትኳቸው እንሱን መመልከትና ማመሳከር ይቻላል።

የመለስ ዜናዊ ራእይ በኢትዮጵያ ልማት፣ እድገት፣ ዲሞክራሲ ማለትስ ምን ማለት ነው? በእርሱ አመራር ለ21 ዓመታት ኢትዮጵያ በልማትና በዲሞክራሲ አብባለች የሚሉት የህወሓት ደጋፊዎችና አጋር ድርጅት ተብለው የሚጠሩት ጸረ-ሕዝብና ጸረ-ኢትዮጵያ ስብስብ ብቻ ናቸው። ብዙ ለሆዳቸው ያደሩም አሉባቸው። ነገሩ የተጋላቢጦሽ ነው። መለስ ዜናዊ የሚመራው ህወሓትና አመራሩ በተፈጥሮው ጸረ-ሕዝብና ጸረ-ዲሞክራሲ ነው። ህወሓት አፈጣጠሩ አምባገነን እና ፋሽስት፣ እንዲሁም ጸረ-ዲሞክራሲ ሆኖ ያደገ ከመቅጽበት የልማት፣ እድገትና ዲሞክራሲ አራማጅ ሊሆን አይችልም። ጎባጣና ጠማማ ሆኖ ያደገ ባህር ዛፍ ተቃንቶ ለኤሌክትሪክ ምሰሶ ወይም ለቤት መስሪያ ማገር ልታደርገው አትችለም። በምሳር ቆራርጦ ማገዶ ከማድረግ ውጪ። ህወሓትን በዚህ አይነት ልንመለከተው ይገባል። ስለሆነም የመለስ ዜናዊ ራእይ ጸረ-ሕዝብ፣ ጸረ-ልማት፣ ጸረ-እድገት፣ ጸረ-ዲሞክራሲ ነው። መለስና ግብረአበሮቹ በዘር ማጥፋት ወንጀል የተሰማሩ፣ በሙስና የሕዝብና የሃገር ሃብት የዘረፉ፣ የኢትዮጵያን ሕዝብ በፋሽስት መዋቅራቸው ያሰቃዩና የገደሉ ናቸው። እንደዚህ ያለ ጨቋኝና ፋሽስት መንግስት ልማታዊ ሊሆን አይችልም።

መለስ ዜናዊና ህወሓት ለኢትዮጵያና ሕዝቧ ምን ናቸው? በመለስ ዜናዊና በስብሃት ነጋ የሚመራው ፋሽስት ፓርቲ፣ ኢትዮጵያን ከግንቦት ወር 1983 ጀምሮ ከተቆጣጠሩ ወዲህ ኢትዮጵያና ሕዝቧ በወያኔ ሀውሓት ቅኝ አገዛዝ የወደቀችበት ወቅት ሆኖ፣ እነሆ ቅኝ ገዢው ህወሓት በሃገራችን አረመኔያዊ ድርጊት እየፈጸመ ይገኛል። በመለስ ዜናዊ የአገዛዝ ዘመን የኢትዮጵያ ሉአላዊንት ፈርሷል። ጥንታዊና ታሪካዊ የቀይ ባሕር ወደቦቿን አጥታለች። ሕዝብ በዘሩ እየታየ የዘር ማጥፋት ወንጀል ተፈጽሟል። ስለዚህ መለስ ዜናዊና ህወሓት እንዲሁም አመራሩ የኢትዮጵያ ደመኛ ጠላት ናቸው።

መለስ ዜናዊ የወታደራዊ ሳይንስና ስትራተጂ ባለ ራእይ ይባላል። ይህ አነጋገር ደረቅ ውሸት ነው። መለስ ዜናዊን የሚያውቁና አብረውት በትግሉ የነበሩ ታጋዮች የማይቀበሉት ጉዳይ ነው። የህወሓት መንጋ በምን ዓይነት የውሸት አዘቅት ውስጥ እንደሰመጠ በግልጽ የሚያሳይ ነው። መለስ ዜናዊ ከትግሉ መጀመሪያ አንስቶ ለብዙ ዓመታት አብረን ተጉዘናል። በጣም የሚተማመንብን ጓደኞቹ ተክሉ ሃዋዝና እኔ ገ/መድህን አርአያ ነበርን። በሚገባ ስለምናውቀው የወታደራዊ ስታርቴጂስት አልነበረም። እውቀቱም ችሎታውም ፈጽሞ አልነበረውም። ሃቁ ይህ ነው።

“ጅብ በማያውቁት ሃገር ሄዶ ቁርበት አንጥፉልኝ” እንዳለው ዓይነት ነው። መለስ ዜናዊ ከፈሪነቱ የተነሳ በተለያዩ ጦርነቶች ፈርቶ የሸሸ፣ በህወሓት ታሪክ ውስጥ በፈሪነቱ ቀዳሚውን ስፍራ የያዘ ግለሰብ ነው። ከሸሸባቸው ጦርነቶች ለአብነት፤

1. በ1969 ከአድዋ ኦፐሬሽን ጦርነቱ እንደተጀመረ ፈርቶ የሸሸ፣
2. በ1970 ከአዲ ደእሮ ፈርቶ የሸሸ፣
3. በ1971 መጀመሪያ ላይ ከማይቅነጠል ውጊያ ፈርቶ የሸሸ፣
4. በ1971 ህዳር ወር ከፈረስ ማይ ጦርነት ፈርቶ የሸሸ፣
5. ሰኔ ወር 1971 ከሃገረ-ሰላም ውጊያ ታመምኩ ብሎ መሬት ላይ ሲንከባለል በበቅሎ ተጭኖ እንዲምለስ የተደረገው  ናቸው። በምስክርነት የሰራዊቱ የጦር አዛዥ አረጋዊ በርሄ የሚያውቀው ጉዳይ ነው።

በህወሓት ውስጥ ማንም ታጋይና አመራር የሚያውቀው ሃቅ አለ። ወታደራዊ እቅድና ስትራቴጂ የነደፈው ጥናት እያደረገ ወታደረአዊ ስትራተጂ ወታደራዊ ታክቲክ የአሸዋ ገባታ ለረጅም አመታት ጥናት በማካሄድ የጻፈና ያዘጋጀ ብቸኛው አረጋዊ በርሄ ነው። ለሁሉም ወታደራዊ አመራር ስየ አብርሃ፣ ሃየሎም አርአያ ወዘተ. አስተምሮ ያሳደጋቸው አረጋዊ በርሄ ነው። ስየ አብርሃ ይሁን ሌላው የሚኩራሩበት ውሸት ነው። ወያኔ ህወሓት እስከ አሁን የሚጠቀሙበት ወታደራዊ ጉዞ በአረጋዊ በርሄ የተዘጋጀ እንጂ መለስ ዜናዊ እስከ እለተ ሞቱ ድረስ ወታደራዊ ሳይንስ ይሁን ስትራተጂ የጤፍ ቅንጣት የምታክል እውቀት አልነበረውም። ሁሉም የሚዋሸው ለሆዱ፣ ለጥቅሙና የሙስና ዘርፊያውን በስፋት ለመቀጠል ስለሚፈልግ የሚመታው የውሸት ነጋሪት ነው።

ግደይ ዘርአጽዮን ከህወሓት ወጥቶ ወደ ስደት ሲሄድ በህቡር ገብረኪዳን መሪነት ተክለወይን አሰፋ፣ ተሻለ ደብረጽዮንን ጨምሮ ተፈትሾ የያዘውን ሰነዶች ሁሉ፣ ብጣሽ ወረቀት ሳትቀር፣ ጠራርገው በመውሰድ ባዶ እጁን ሱዳን ገባ።

አረጋዊ በርሄ፣ ህቡር ገ/ኪዳን፣ ስብሃት ነጋ፣ አርከበ እቁባይ ሁነው ለብዙ ዓመታት ሲያካሂዱት የነበረውን ወታደራዊ ጥናትና ስትራተጂ የአሸዋ ገበታ፤ በትልልቅ ወረቀቶች ላይ በሰእል መልክ የተዘጋጁ ጠቅላላ ወታደራዊ መጻሕፍት ብጣሽ ወረቀት ሳትቀር በሁለት የማዳበሪያ ከረጢት ሞልተው የወረሱትን በታጋዮች አሸክመው ለመለስ ዜናዊ አስረከቡት። ‘በሰው ደንደስ በርበሬ ተወደሰ’ እንደተባለው፣ መለስ ዜናዊ ባልሰራውና በማያውቀው ወታደራዊ ስትራተጂ የአሸዋ ገበታ ንድፈ ሃሳብና አረጋዊ በርሄ ደክሞ ያዘጋጀው ነው። አሁን ወያኔ የሚጠቀምበት ወታደራዊ አካሄድ የአረጋዊ በርሄ ሥራና ጥናት ነው። ባልሰራኸው፣ በማታውቀው ጥበብ የራስህ አስመስለህ መጠቀም ያስንቃል፣ ያዋርዳል። ስለዚህ መለስና የህወሓት መንጋ ውሸታምና በምን ዓይነት ድቅድቅ የውሸት ጨለማ እንደተዘፈቁና ማንነታቸውን እንዲያውቁ ይህንን የጽሑፍ ሰነድ እዚህ ላይ ያንብቡ። (ፎቶ: መለስ ዜናዊ ጥይት ማይበሳው ብርጭቆ ቤት ውስጥ በመስቀል አደባባይ ንግግር ሲያደርጉ – REUTERS/Thomas Mukoya)

ገብረመድህን አርአያ

ዛሬም እንደ አድዋው ጊዜ አብረን እንነሳ!!!

March 3,2016

በያዝነው ሳምንት አባቶቻችን የነበረውን የትጥቅ የበላይነት መከታ በማድረግ ሀገራችን ኢትዮጵያን ለመውረርና ህዝቧን በውርደትና በባርነት ለመግዛት የዘመተብንን የጣሊያን ጦር አለምን ማስደነቅ ብቻ ሳይሆን የታሪክን አቅጣጫ የቀየርውን ያድዋን ጦርነት ድል የመቱበት 120ኛ ዐመት ይከበራል። አድዋ ሲወሳ ፈጽሞ ልንረሳው የማንችለው ነገር በእግር በፈረስ ከሀገራችን ልዩ ልዩ ቦታዎች የብሔረሰብም ሆነ ሌላ ልዩነት ሳያግዳቸው እንደ አንድ ሰው የተነሱ አባቶቻችንን የህብረት ተጋድሏቸውን ነው።

የድላቸው ዋንኛ ምክንያትም ህብረትና አንድነታቸው እንደነበር ልንዘነጋው አይገባም። እድዋ የመላው ጥቁር ሕዝብ አንጸባራቂና አለም ያላሰበው ድል እንዲሆን ያደረገው አባቶቻችን ወርደትንና ባርነትን ከሞት በላይ ስለቆጠሩት ብቻ ሳይሆን በህብረትና ባንድነት መነሳታቸው እንደነበር ፈጽሞ ልንዘነጋው አይገባም። ተዋርዶና ተንበርክኮ መገዛትን ምንም ያህል ቢጠሉ እንደ አንድ ሰው ሆነው ባይነሱ ይህን እንጸባራቂ ድል ይቀዳጁ ነበር ብሎ ማሰብ ይከብዳል።

ዛሬ በተደጋጋሚ ሀገራችንን የወረሩ ጠላቶች ሁሉ ሊጠቀሙበት ሞክረው ያልቻሉትን የከፋፍለህ ግዛ ሴራ በመጠቀም እንደባዕድ ሊገዛን እየሞከረ ያለውና ሀገራችንን ካላንዳች ይሉኝታ በመዝረፍና ልጆቹዋን ካለርሕራሔ በመጨፍጨፍ ላይ የሚገኘውን የሁላችንም ጠላት የሆነውን ወያኔን ከላያችን ላይ አሽቀንጥረን የምንጥለውና ነጻነታችንን የምንቀዳጀው እንደ አድዋው ጊዜ እብረን የተነሳን እንደሆን ብቻ ነው። ወያኔ 25 ዓምት የፈነጨብንና ሀገራችንን ከባዕድ ባልተናነሰ ዛራፊነትና ጨፍጫፊነት ሊገዛ የቻለው የውበታችን ምልክት የሆነውን ብሔረሰባዊ ልዩነታችንን እየተጠቀመ ይሁን እንጂ ብዙዎቻችንም ተመሳሳይ ዓላማ ይዘን በህብረት ለመታገል ባለመወሰናችን ካባቶቻችን ያድዋ ትሪክ ባለመማራችን መሆኑን መካድ አይቻልም።

ብዙ ወገኖቻችን ሲሉ እንደሚሰማው የወያኔው ጉጅሌ ሀይል የራሱ ድርጅታዊ ጥንካሬ የፈጠረለት ሀይል ሳይሆን ከኛ መከፋፈል ያገኘው ነው። ዛሬ በኦሮሚያና ሌሎች አካባቢዎች የህዝቡን መሬት ካለይሉኝታ የሚዘርፈው ወያኔ፣ ሕጻን ሽማግሌ ሳይለይ በእብሪትና በድፍረት መደዳውን ኦሮሞ ወገኖቻችንን እየጨፈጭፈ ያለው ህዝቡ አይተባበርም በሚል ነው። የሀገራችንን ድንበር ቆርሶ ለመስጠት ከጀርባችን ሆኖ የሚደራደረው የተባበረና አንድ ድምጽ ያለው ህዝብ አይጠይቀኝም ከሚል በመነጨ ጥጋብ ነው። የወልቃይት ጠገዴ ህዝብ ማንነቴን ከናንተ ይበልጥ የማውቀው ራሴ ነኝ ስላላቸው እየነቀሱ የሚያፍኑትና ይስንቱን ቤት ለዘላለሙ እንዲዘጋ ያደረጉት የሚተባበር ሕዝብ የለም በሚል ተስፋ ነው።
ወያኔ የብሔረሰብ ልዩነታችንን ብቻ ሳይሆን በትግል ዘዴ አመራረጣችንና በተለያዩ በክርክር ሊቋጩ የሚችሉ የፖለቲካ ልዩነታችን መሀል በመግባት ወደ አንድነት እንዳንመጣ ከለመታከት ይሰራል። በተወሰነ ደረጃም ቢሆን ይህ እንዲሆን የፈቀድንለት ራሳችን በመሆናችን ላለመተባበራችን ሁላችንም የተወሰነ ወቀሳ መውሰድ ይኖርብናል።

አሁን ጊዜ የለንም። ወገኖቻችን በገፍ አየተጨፈጨፉ መፈጠራቸውን ሊጠሉ በቻሉበት ደረጃ ደርሰዋል። በየቦታው አመጾች በመቀጣጠል ላይ ናቸው። ወያኔ በተወሰነ ደረጃ የህዝቡ ቁጣ ስላስደነገጠው የሚያውቀውን የመጨፍጨፍና የመቀጥቀጥ ፖለቲካ በስፋት ተያይዞታል።አርበኞች ገንቦት 7 በሀገርም ከሐገር ውጭም ካሉ የኢትዮጵያ የፖለቲካ ሀይሎች ጋር ያድዋውን አይነት ህብረት እንዲፈጠር ይፈልጋል። ያለን መስፈሪያ ሀገራችንን ሉዓላዊ ሆና መቀጠሉዋና ወደፊት የምንመሰርተው መንግስት ዲሞክራሲያዊ መሆኑን ማረጋገጥ ብቻ ነው። እኛ በሰላምም በሐይል አማራጭም ከወያኔ ጋር የሚተናነቁትን ማንኛውንም የፖለቲካ ሀይሎች እንደግፋለን። ሕዝባችን ወይ ተባበሩ ወይ ተሰባበሩ እያለ ሲጮህ ብዙ ዘመን ሆነው። እናም እንተባበር።

አባቶቻችን የዛሬ መቶ ሀያ አመት የተጠቀሙበት ስልት ለኛ ለልጅ ልጆቻቸው የሚሳነን ሊሆን አይገባም። ሁል ጊዜ እንደሚባለው እንድነት ሀይል ነው። ወያኔ አንድ ላይ በቆምን ማግስት በኢትዮጵያ መሬት ላይ አይኖርም። አድዋ ላይ ጠላትን ተባብረው እንዳንበረከኩት አባቶቻችን፣ ራሳቸውንና እኛን ልጆቻቸውን ብቻ ሳይሆን መላውን ጥቁር ህዝብ እንዳኮሩትና የአለም ታሪክን አቅጣጫ እንደቀየሩት አባቶቻቸን ተባብረን እንድንነሳ አርበኞች ግንቦት 7 የትግል ጥሪውን ያቀርባል።

ድል ለኢትዮጵያ ህዝብ!